يا الله يالخلاق يا رب الملا يالمستعان
يا غافر ذنوب البشر ياللي تجيب السايلين
تقبل دعاء اللي يطلبونك سر والا في علان
وتنفس الكربه على المحتاج مكبول اليدين
وتجبر مصابن صابنا واللي يجي منك امتحان
تبا شوف اللي على جور المصايب صابرين
يارب وفقنا على القول الصحيح من اللسان
ويالله وفقنا على درب الهدا مع المهتدين
ويارب لين قلب قايد والعيال مع الاخوان
وارحم سعود اللي رحل عنا قبل خمسة سنين
وافرج لاخونا اللي بلاه ابليس لين اصبح مهان
والموت. حق وكل خلق الله تراهم راحلين
تكفى يا ابن مناع والمعروف من ماض الزمان
العفو عند المقدره وانتم تراكم قادرين
اعتق رقبته واجرها عند الولي خضر الجنان
اللي جعلها الله وعد للمهتدين الصالحين
وانتم هل المعروف والمعروف لاسوي يبان
اكسبها لامن بذلت الطيبه دنيا ودين
والله مافي قطع راسه لاسداد ولاهوان
ماهو مرجع لك ولدك ولابرى الجرح الدفين
هذا القضاء وهذا القدر واللي حصل غلطة زمان
مصيبت(ن) جره عليها الطيش وابليس اللعين
(تكفى) وانا ابا اسالك كمن قالها قبلي لسان
ترا الخلايق كلبوهم للعفو متوسلين
والله ماتندم على العفو وعلى صفح وليان
حصيلك المعروف ودعاء الساجدين الراكعين
وتكسب دعاء امن صابها من ماحصل مثل الجنان
تسهر طويل الليل يوم ان الخلايق نايمين
وختامها يالله يارب الملا يالمستعان
اتنفس الكربه على المحتاج مكبول اليدين